បូលីវី ៖ រថយន្តធំៗរាប់រយគ្រឿង និងរថយន្តតូចៗរាប់សិបគ្រឿងផ្សេងទៀត បានជាប់គាំងនៅមួយកន្លែងនៅតាមដងផ្លូវ នាភាគខាងលិចប្រទេសបូលីវី កាលពីថ្ងៃព្រហស្បតិ៍។
ការកកស្ទះនៃរថយន្តរាប់រយគ្រឿងនៅតាមដងផ្លូវហាយវេ បានកើតឡើងក្នុងពេលមនុស្សរាប់រយនាក់នៅតំបន់គូរ៉ាហ្គារ៉ា ឌឺការរ៉ាន់ហ្កាស់ ប្រមូលផ្តុំគ្នាតវ៉ាទាមទារអោយរដ្ឋាភិបាលស្ថាបនាផ្លូវជាតិ ចេញពីទីក្រុងនានា ភ្ជាប់ទៅកាន់តំបន់ពួកគេរស់នៅ។
ប្រភពព័ត៌មានអោយដឹងថា បាតុកម្មតវ៉ាទាមទារកសាងផ្លូវនេះ បានធ្វើឡើងអស់រយៈពេលបីបួនថ្ងៃកន្លងមកហើយ តែមិនទាន់មានការដោះស្រាយឆ្លើយតបពីរដ្ឋាភិបាលយ៉ាងណានោះនៅឡើយ ទេ។
ក្រុមអ្នកតវ៉ាបានត្អូញត្អែរថា ពួកគេត្រូវធ្វើដំណើរយ៉ាងពិបាកក្នុងចម្ងាយផ្លូវយ៉ាងឆ្ងាយ ដើម្បីឆ្ពោះទៅកាន់ទីកន្លែងផ្សេងៗ។
អាជ្ញាធរក្នុងតំបន់នោះអោយដឹងថា ការធ្វើបាតុកម្មតវ៉ា បណ្តាលអោយរាំងស្ទះរថយន្តធំៗចំនួនជាង ៨៥០ គ្រឿង រថយន្តសណ្តោងកុងតេន័រចំនួន ១៥០ គ្រឿង និងរថយន្តតូចរាប់រយគ្រឿងផ្សេងទៀត៕
វង្ស រិទ្ធី
