ប្រទេសអ៊ីរ៉ង់ និងក្រុមឃ្លាំមើលនុយក្លេអ៊ែរ អង្គការសហប្រជាជាតិបានព្រមព្រៀងថានឹងជួបប្រជុំទៀត នៅសប្ដាហ៍ក្រោយរយៈពេលតែពីរថ្ងៃមុនក្រុងតេអេរ៉ង់ចាប់ផ្ដើមការចរចាជាមួយប្រទេសមហាអំណាចពិភពលោក ដែលព្រួយបារម្ភថា អ៊ីរ៉ង់ប្រហែលកំពុងស្វះស្វែងដើម្បីអភិវឌ្ឍន៍សមត្ថភាពគ្រាប់បែកបរមាណូ។
ដោយឡែភាគីទាំងពីរមានសេចក្ដីសង្ឃឹមអំពើការចរចា ដែលនឹងបន្តធ្វើនៅថ្ងៃច័ន្ទ ពុំមានពាក្យពេចន៍ ណាមួយស្ដីពីថាតើទីភ្នាក់ងាររបស់អង្គការសហប្រជាជាតិបានធ្វើការរីកចម្រើនឆ្ពោះទៅរកគោលដៅមួយក្នុងចំណោមគោលដៅសំខាន់ៗរបស់ខ្លួនទេ...ដើម្បីទទួលបាននូវសិទ្ធិចូលទៅកាន់កន្លែងយោធា ដែលគេសង្ស័យនៅជិតទៅក្រុងតេអេរ៉ង់នោះ។
អគ្គនាយករង ទីភ្នាក់ងារ ថាមពលបរមាណូអន្តរជាតិ(IAEA) លោក ហឺម៉ាន ណាក់កាអ៊ើត បាននិយាយប្រាប់អ្នកយកព័ត៌មាននៅឯបេសកកម្មការទូតអ៊ីរ៉ង់នៅក្នុងទីក្រុងវីយ៉េនជាកន្លែងបើកកិច្ចប្រជុំនោះថា «យើងមានការផ្ដោះប្ដូរទស្សនៈដ៏ល្អ ហើយយើងនឹងជួបប្រជុំគ្នាម្ដងទៀតនៅថ្ងៃច័ន្ទ»។
លោកនិយាយថា អ្នកដែលកំពុងឈរនៅក្បែរលោកគឺ ឯកអគ្គរដ្ឋទូត អ៊ីរ៉ង់ លោកអាលី អាស់ហ្កាសូលតានីយ៉េ កាន់តែមានវិជ្ជមានទៅទៀត។ «យើងមានការចរចាពោរពេញដោយផ្លែផ្កានៅក្នុងបរិយាកាសដ៏ល្អ។ យើងមានការរីកចម្រើន»។
ពុំមានភាគីណាមួយផ្ដល់ភាពលំអិតអំពីខ្លឹមសារនៃការចរចានោះទេ ហើយគេមិនបាននិយាយថាតើគេបានចរចាពីរឿងថា អ៊ីរ៉ង់នឹងអនុញ្ញាតឲ្យពួកអ្នកត្រួតពិនិត្យអង្គការសហប្រជាជាតិធ្វើទស្សនកិច្ចទៅកាន់ កន្លែងយោធា ប៉ាជីន ដែលក្រុមឃ្លាមើលសង្ស័យថាគេកំពុងធ្វើការស្រាវជ្រាវពាក់ព័ន្ធគ្រាប់បែកនុយក្លេអ៊ែរនោះ៕
រឹទ្ធ
