តាមសារលិខិតថ្មីៗដែលបានផ្ដោះប្ដូររវាងភាគីទាំង២បានឲ្យដឹងថា ប្រទេសអ៊ីរ៉ង់និងប្រទេសមហាអំណាចពិភពលោកទាំង៦ ដែលកំពុងបញ្ចុះបញ្ចូលក្រុងតេអេរ៉ង់ឲ្យផ្អាកសកម្មភាពនុយក្លេអ៊ែររបស់ខ្លួននោះ ហាក់ដូចជានឹងចាប់ផ្ដើមចរចានៅចុងខែនេះដោយមិនបានដោះស្រាយការខ្វែងយោបល់គ្នា ដែលកើតមាននៅក្នុងការចរចាលើកមុនៗនោះ។
សារលិខិតមួយដែលបានចែករំលែកជាមួយAP កាលពីថ្ងៃសុក្រនោះបានបង្ហាញឲ្យឃើញថា ប្រទេសអ៊ីរ៉ង់ដែលកំពុងស្វែងរកកិច្ចប្រជុំថ្នាក់ជំនាញការមួយមុនការចរចាក្រុងមូស្គូថ្ងៃទី១៨ ដល់ថ្ងៃទី១៩ ខែ មិថុនា ដើម្បីរៀបចំមូលដ្ឋានចាំបាច់សម្រាប់ការចរចាក្រុងមូស្គូ។
នៅក្នុងការឆ្លើយតបតំណាងជាន់ខ្ពស់ម្នាក់របស់សហភាពអឺរ៉ុប ដែលកំពុងនិយាយជំនួសមុខឲ្យប្រទេសមហាអំណាចទាំង៦នោះ បានលើកឡើងថាពុំមានការត្រូវការណាមួយសម្រាប់ការចរចាបឋមបែបនេះទេ ព្រោះថាប្រទេសមហាអំណាចទាំង៦នៅតែតាំងចិត្តចំពោះសំណើរបស់គេដែលបានបង្ហាញនៅក្នុងការប្រជុំចុងក្រោយនៅក្នុងទីក្រុងបាដាដនោះ។
ពោលគឺសារលិខិតរបស់លោកស្រីបានទទូចដល់ក្រុងតេអេរ៉ង់ឲ្យទទួលយកសំណើនោះដែលនឹងផ្ដល់នូវគ្រឿងលើកទឹកចិត្ត ប្រសិនបើក្រុងតេអេរ៉ង់តាក់បន្ថយការចំរាញ់អ៊ុយរ៉ានីញ៉ូមដែលអាចបង្កើតសម្ភារៈកម្រិតអាវុធក៏ដូចជានុយក្លេអ៊ែរនោះ។
កាលពីថ្ងៃថាមពលនុយក្លេអ៊ែររបស់អង្គការសហប្រជាជាតិ បានបញ្ចុះបញ្ចូលប្រទេសអ៊ីរ៉ង់ឲ្យអនុញ្ញាតឲ្យខ្លួនបើកធ្វើការស៊ើបអង្កេតឡើងវិញ ពីការសង្ស័យដែលថាក្រុងតេអេរ៉ង់ បានធ្វើការដោយសម្ងាត់នូវអាវុធបរមាណូនោះ ដោយបានដាក់បន្ទុកថែមទៀតទៅលើបរិយាកាសមុនការចរចាក្រុងមូស្គូ។
ការស៊ើបអង្កេតរបស់ទីភ្នាក់ងារថាមពលបរមាណូអន្តរជាតិ(IAEA) ត្រូវបានរាំងស្ទះដោយសារតែប្រទេសទទូចថាការចោទប្រកាន់ទាំងនោះផ្អែកទៅលើព័ត៌មានចារកម្មរបស់អ៊ីស្រាអែល និង អាមេរិកដែលគេបង្កើត។ ប្រទេសមហាអំណាចទាំង៦មាន សហរដ្ឋអាមេរិក ប្រទេសរុស្សី ប្រទេសចិន ប្រទេសអង់គ្លេស ប្រទេសបារាំង និង ប្រទេសអាល្លឺម៉ង់នោះ បានកំពុងឃ្លាំមើលលទ្ធផលចរចារបស់ទីភ្នាក់ងារនៅក្នុងទីក្រុងរីយ៉ែន យ៉ាងប្រកៀកដើម្បីចង់បានសញ្ញាបន្ទន់ឥរិយាបថរបស់អ៊ីរ៉ង់។ ប៉ុន្តែការប្រជុំរយៈពេលពេញមួយថ្ងៃបានបញ្ចប់ទៅដោយគ្មានការព្រមព្រៀង៕
រឹទ្ធ
