តាមប៉ូលិសជាតិលោកស្រីអាមិនតា ហ្គ្រានេរ៉ា បានប្រកាសកាលពីថ្ងៃសុក្រទី២៤ ខែសីហា ថាប៉ូលិសនីការ៉ាហ្គាបានរកឃើញប្រាក់ប្រហែល៧លានដុល្លារ ដែលជាប្រាក់រត់ពន្ធនៅក្នុងរថយន្តមួយគ្រឿង ដែលបើកដោយមនុស្សតាំងខ្លួនជាសមាជិករបស់ក្រុមផ្សាយព័ត៌មានរបស់ទូរទស្សន៍ម៉ិកស៊ិក។
មនុស្ស១៨នាក់បានធ្វើដំណើរនៅក្នុងរថយន្ត៦គ្រឿងត្រូវបានចាប់ឃុំខ្លួនកាលពីថ្ងៃពុធនៅព្រំដែនជាមួយប្រទេសហុងដូរ៉ាស់នៅភាគខាងជើងប្រទេសនីការ៉ាហ្គាបន្ទាប់ពីពួកគេបានចូលមកប្រទេសនីការ៉ាហ្គានិង បាននិយាយថា ពួកគេបានមកកាន់ទីនេះដើម្បីយកព័ត៌មានស្ដីអំពីការជំនុំជម្រះជនសង្ស័យ ដែលជាប់ទាក់ទងនឹងការសម្លាប់អ្នកចម្រៀងប្រពៃណីអាហ្សង់ទីន លោក ហ្វាគុនដូ កាប្រាល់ នៅក្នុងឆ្នាំ២០១១។
ការជំនុំជម្រះនេះបានជាប់ពាក់ព័ន្ធនឹងការចោទប្រកាន់ពីបទលាងលុយកង្វក់ដ៏ច្រើនសម្បើម។ រថយន្តមួយចំនួនមានអក្សរឡូហ្គោថា Mexico's Televisa network ដែលពួកគេបាននិយាយថាពុំមានជាប់ទាក់ទងជាមួយជនសង្ស័យនោះទេ។យ៉ាងហោចណាស់ក៏មានរថយន្តមួយគ្រឿង ដែលនៅលើដំបូលគេឃើញមានដូចជាប្រភេទថាផ្កាយ ដែលបណ្ដាញទូរទស្សន៍ប្រើប្រាស់សម្រាប់ផ្សាយនៅតំបន់ឆ្ងាយដាច់ស្រយាល។
ក្រុមទូរទស្សន៍នេះបាននិយាយថា ខ្លួនពុំមានអ្នករាយការណ៍ព័ត៌មាននៅវ ទេថែមទាំងមិនបានបញ្ជូនអ្នកណាម្នាក់មកកាន់ទីនោះដែរ។ លោកស្រីហ្គ្រានេរ៉ាបាននិយាយថាជនសង្ស័យបាននិយាយប្រាប់ប៉ូលិសថា ហិបប្រហែល២៥ ដែលលាក់នៅក្នុងរថយន្ត គឺពេញទៅដោយប្រាក់។ លោកស្រីហ្គ្រានេរ៉ា បន្តថាឧបាយកលនេះមានបំណងដើម្បីរត់ពន្ធប្រាក់ឆ្លងកាត់ប្រទេសនីការ៉ាហ្គាទៅកាន់ប្រទេសជិតខាងកូស្ដារីកានៅភាគខាងត្បូង៕
ថាលីយ៉ាន
