ភ្នំពេញ ៖ រថយន្តយោធាមួយគ្រឿងជាជំនួយរបស់ប្រទេសចិនបានក្លាយទៅជារថយន្តស៊ីឈ្នួលដឹកឈើនិងគ្រែពីព្រំដែនមកភ្នំពេញយ៉ាងរំភើយដើម្បីកំញើញសមត្ថកិច្ច។
រថយន្តស៊ីឈ្នួលដឹកឈើពណ៌ត្រីអ៊ីពាក់ស្លាកលេខខ.ម៩៩០០៩ដឹកឈើនិងគ្រែពេញដឹកពីតំបន់ព្រំដែនមកទុកឃ្លាំងមួយកន្លែងស្ថិតនៅផ្លូវ១០៣សង្កាត់ផ្សារដើមថ្កូវខណ្ឌចំការមនត្រូវបានគេប្រាប់ឲ្យដឹងថាដឹកឈើឲ្យឈ្មួញ។
ប្រភពបានឲ្យដឹងថារថយន្តនោះត្រូវឈ្មួញឈើឈ្មោះ ចែនីជួលដឹកឈើគ្រែពីតំបន់ព្រំដែនខេត្តព្រះវិហារផងនិងបន្ទាយមានជ័យផងមកភ្នំពេញតាំងពីយប់ថ្ងៃទី១៥មកម្ល៉េះ។ លុះមកព្រឹកថ្ងៃទី១៦រថយន្តយោធាដដែរនោះបានដឹកឈើនិងគ្រែមកដល់ភ្នំពេញហើយបើកចូលយ៉ាងលឿនទៅក្នុងដីឡូមួយកន្លែងស្ថិតនៅតាមផ្លូវ១០៣សង្កាត់ផ្សារដើមថ្កូវដោយមានទាហាន៣ ៤នាក់មកតាមរថយន្តនោះផងដែរ។ប៉ុន្តែពេលមកដល់និងកំពុងលើកដាក់ឈើមន្ត្រីយោធាទាំងនោះខ្លាចគេស្គាល់រថយន្តបានព្យាយាមបិទបាំងស្លាកលេខមិនឲ្យឃើញឡើយ។
ប្រភពដដែលបានបញ្ជាក់ថារថយន្តយោធាស៊ីឈ្នួលដឹកឈើនោះជាជំនួយរបស់ប្រទេសចិនឲ្យមកកម្ពុជាប៉ុន្តែបច្ចុប្បន្នរថយន្តនោះបានក្លាយទៅជារថយន្តស៊ីឈ្នួលដឹកឈើ។ចំណែកឯថ្នាក់ដឹកនាំក៏មិនគួរបណ្ដែតបណ្ដោយឲ្យកូនចៅយករថយន្តយោធានោះមករកស៊ីដូចច្នេះទេ។ប្រភពដដែរបញ្ជាក់ថាការដែលឈ្មួញជួលរថយន្តយោធាដឹកឈើឬគ្រែមកភ្នំពេញគឺងាយស្រួលនិងមិនបារម្ភពីការបាត់បង់ឬត្រូវមន្ត្រីរដ្ឋបាលព្រៃឈើចាប់តាមផ្លូវព្រោះរថយន្តយោធាមានឥទ្ធិពលខ្លាំងជាងរថយន្តស៊ីវិល។ប្រភពនៅកន្លែងដាក់ឈើបានឲ្យដឹងថាខណៈពេលកម្មករកំពុងដាក់ឈើនិងគ្រែចុះពីរថយន្តយោធាគេឃើញមន្ត្រីរដ្ឋបាលព្រៃឈើឈ្មោះរិទ្ធនិងប៉ូលិសសេដ្ឋកិច្ចម្នាក់ទៀតឈ្មោះយ៉ាជិះរថយន្តកាមរីពណ៌ស្លែពាក់ស្លាកលេខភ្នំពេញ2I-4752មកដល់ចូលជួបស្រីម្នាក់ជាម្ចាស់ទីតាំងក្រោយពីនិយាយគ្នាអស់មួយសន្ទុះស្ត្រីរូបនោះក៏បានហុចលុយតាមកញ្ចក់ប៉ុន្តែមិនដឹងចំនួនប៉ុន្មានទេហើយមន្ត្រីរដ្ឋបាលព្រៃឈើក៏បានបើករថយន្តចេញ៕
ឌួងវរជ័យ
