វត្តមានក្នុងឱកាសនោះរួមមានលោក ប៉ិច សុខិន ប្រធានគណៈកម្មាធិការបក្សខេត្ត លោក នៅ សំ អ្នកតំណាងរាស្ត្រមណ្ឌលឧត្តរមានជ័យ អស់លោក លោកស្រីក្រុមការងារចុះជួយ ឃុំ ស្រុក ខេត្ត និងតំណាងគណបក្សប្រជាជនកម្ពុជាមកពីគ្រប់ថ្នាក់ក្នុងខេត្តឧត្តរមានជ័យ។អង្គប្រជុំបានស្តាប់នូវរបាយការណ៍ និងមតិស្វាគមន៍ លោក ប៉ិច សុខិន បានលើកឡើងអំពី សកម្មភាពទូទៅរបស់គណបក្សសំរេចបាននៅគ្រប់មូលដ្ឋានទូទាំងខេត្ត ដែលពីមួយថ្ងៃទៅមួយថ្ងៃ ចំនួន សមាជិកបានកើនឡើងជាលំដាប់ មានភាពរឹងមាំជានិច្ច ដែលនេះគឺផ្តើមចេញពីការយល់ច្បាស់នូវគោលនយោបាយ និងការដឹកនាំរបស់គណបក្សប្រជាជនកម្ពុជា ។
លោក ជា តារា បានថ្លែងនូវការកោតសរសើរដល់មន្ត្រីគណបក្ស ទាំងអស់ ដែលបានយកចិត្តទុកដាក់អស់ពីកម្លាំងកាយចិត្ត ក្នុងការធ្វើសកម្មភាពដ៏ល្អ ចលនាកសាងបក្ស ក៏ដូចជាការចូលរួមអភិវឌ្ឍន៍មូលដ្ឋានឲ្យមានការរីកចំរើនជាបន្តបន្ទាប់ ធ្វើឲ្យភូមិ ឃុំទូទាំងខេត្ត ដែលជាខេត្តជាប់ព្រំដែន តំបន់ឆ្ងាយដាច់ស្រយាលជាប់ជួរភ្នំដងរែកពីមុន មានការកែប្រែមុខមាត់ថ្មី គួរឲ្យកត់សំគាល់ ។ សមិទ្ធផលទាំងនេះគឺបានមកពីគោលនយោបាយដ៏ត្រឹមត្រូវរបស់គណបក្សប្រជាជនកម្ពុជា និងយុទ្ធសាស្ត្រចតុកោណរបស់រាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា ក្នុងការនាំមកនូវសុខសន្តិភាព និងការអភិវឌ្ឍន៍ ពិសេសតំបន់តាមបន្ទាត់ព្រំដែន ។ លោកបានក្រើនរំលឹកដល់សមាជិកសមាជិកាគណបក្សប្រជាជនកម្ពុជាគ្រប់រូប មិនត្រូវបំភ្លេចនូវភារកិច្ចចម្បងរបស់យើង គឺត្រូវខិតខំធ្វើយ៉ាងណាបង្កើននូវជំនឿទុកចិត្តពីប្រជាជន ព្យាយាមលុបបំបាត់ឲ្យអស់នូវបាតុភាពដែលនាំឲ្យប្រជាជនមានការថ្នាំងថ្នាក់ ក្នុងនោះត្រូវចុះជាប់ដល់មូលដ្ឋាន ស្វែងយល់អំពីសុខទុក្ខរបស់ប្រជាជននិងធ្វើការដោះស្រាយទាន់ពេលវេលានូវរាល់សំណូមពរផ្សេងៗ។ ខណៈដែលការបោះឆ្នោតឃុំសង្កាត់កាន់តែខិតជិតចូលមកដល់ ត្រូវយកចិត្តទុកដាក់អនុវត្ត សេចក្តីសំរេច ស្តីពីផែនការឆ្ពោះទៅកាន់ការបោះឆ្នោតឃុំសង្កាត់អាណត្តិទី៣ ដល់មន្ត្រីបង្គោលគ្រប់ថ្នាក់ របស់យើងបានជ្រួតជ្រាប និងចូលរួមសហការអនុវត្តទៅតាមជំហាននីមួយៗ ឲ្យបានស៊ីជំរៅនៅគ្រប់មូលដ្ឋានទទួលខុសត្រូវរបស់ខ្លួន។ ត្រូវណែនាំក្រុមគ្រួសារ សមាជិក សមាជិកា គ្រប់សាខា និងក្រុមបក្ស ឲ្យបានស្គាល់ច្បាស់អំពីទីតាំង ស្គាល់ពីលេខរៀងគណបក្សប្រជាជន របៀបគូសសន្លឹកឆ្នោតឲ្យបាន ត្រឹមត្រូវ និងនាំគ្នាទៅបោះឆ្នោតជូនគណបក្សប្រជាជនកម្ពុជា ឲ្យបានគ្រប់ៗគ្នា៕
ច័ន្ទ ពន្លឹក
