ព្រះសីហនុ ៖ អំណាចទឹកភ្លៀងធ្លាក់ជោគជាំជាប្រចាំក្នុងអំឡុងរយៈពេល ១ ខែ គឺចាប់ពីដើមខែឧសភា ឆ្នាំ២០១២ រហូតមកជិតដល់ដើម ខែមិថុនា នេះ មានសភាពខ្លាំងក្លាណាស់ ជាហេតុធ្វើឲ្យតំបន់ មួយចំនួនឈរនៅក្នុងក្រុងព្រះសីហនុ ដែលពុំមានប្រព័ន្ធលូរំដោះទឹកច្បាស់លាស់ ត្រូវទឹកជន់លិច ជាពិសេស គឺតំបន់ឆ្នេរសមុទ្រអូរឈើទាល ត្រង់ចំណុចចាប់ពីខាងមុខអតីតបន្ទាយប៉ូលិស ការពារព្រំដែនទឹក រហូតទៅដល់ខាងមុខសណ្ឋាគារ ផ្កាម្លិះ តែម្តង។
បញ្ហានេះ កំពុងជះឥទ្ធិពលមិនល្អទាល់តែសោះ ទៅដល់វិស័យទេសចរណ៍នារដូវវស្សាផងដែរ។ មន្ត្រីមន្ទីរទេសចរណ៍ ខេត្ត ព្រះសីហនុ បានទទួលស្គាល់ថា អ្វីដែលបានលើកឡើងខាងលើនេះ វាជាការពិត ព្រមទាំងបានធ្វើការអះអាងផងដែរថា មូលហេតុដែលធ្វើឲ្យទឹកជន់លិចនេះ គឺបណ្តាលមកពីតំបន់នេះ ទំនាបជាងគេ បូករួមនិងប្រព័ន្ធលូបង្ហូរទឹក រំដោះទឹក មិនច្បាស់លាស់ រួមផ្សំ និងការចាក់ដីខ្ពស់ជាងផ្លូវពីកន្លែងសេវាកម្មមួយចំនួនផងនោះ ទើបធ្វើឲ្យមានទឹកជន់លិចជាប្រចាំបែបនេះ ឲ្យតែដល់រដូវវស្សា។
មន្ត្រីទេសចរណ៍ដដែល បានបន្តទៀតថា ជុំវិញបញ្ហានេះ ខាងមន្ទីរទេសចរណ៍ ធ្លាប់ធ្វើសេចក្តីរាយការណ៍ជាច្រើនលើកមកហើយ ទៅដល់អាជ្ញាធរក្រុង អាជ្ញាធរខេត្តព្រះសីហនុ ដើម្បីសុំឲ្យជួយធ្វើអន្តរាគមន៍ ចាត់មន្ត្រីជំនាញរបស់មន្ទីរសាធារណការ ចុះមកពិនិត្យ និងរកវិធានការដោះស្រាយប្រព័ន្ធលូបង្ហូរទឹក តាមលក្ខណៈបច្ចេកទេស ប៉ុន្តែ លទ្ធផលដូចជាមិនទទួលបានអ្វីបន្តិចសោះហើយ ទឹកជន់លិចនៅតែលិចជាប្រចាំ។
គួរបញ្ជាក់ផងដែរថា តំបន់ទេសចរណ៍ឆ្នេរសមុទ្រ ខេត្តព្រះសីហនុ ថ្វីត្បិតតែទទួលរងឥទ្ធិពលភ្លៀងធ្លាក់ច្រើន ធ្វើឲ្យចំនួនទេសចរណ៍មានការថយចុះក៏ដោយ ប៉ុន្តែ សម្រាប់អាជីវកម្មផ្សេងៗទៀត ដូចជា ការនេសាទសមុទ្រ និងការងារកសិកម្ម ជាដើម ពុំមានផលប៉ះពាល់ធ្ងន់ធ្ងរអ្វីទេ។
តែទោះជាយ៉ាងនេះក្តី បញ្ហានេះ អាជ្ញាធរពាក់ព័ន្ធ គួរតែមានការតាមដានអង្កេតឲ្យបានដិតដល់ និងធ្វើការផ្សព្វផ្សាយឲ្យប្រជាពលរដ្ឋឲ្យមានការប្រុងប្រយ័ត្ន ពិសេស ចំពោះការចេញទូកទៅនេសាទ ក៏ដូចជា ទូកបម្រើសេវាកម្មដឹកភ្ញៀវទេសចរណ៍ដើរកម្សាន្ត លេងតាមកោះក្នុងលំហសមុទ្រ ជាដើម៕
កោះពស់
