ស្វាយរៀង ៖ សន្និបាតបូកសរុបការងារប្រចាំឆ្នាំ២០១២ និងទិសដៅសម្រាប់អនុវត្តបន្តឆ្នាំ២០១៣ របស់គណៈកម្មាធិការសហភាពសហព័ន្ធយុវជនកម្ពុជា ខេត្តស្វាយរៀង ដែលពិធីនេះត្រូវបានប្រារព្ធធ្វើឡើង នៅព្រឹកថ្ងៃទី២៦ ខែកុម្ភៈ ឆ្នាំ២០១៣ នៅសាលប្រជុំធំរបស់សាកលវិទ្យាល័យស្វាយរៀង ក្រោមវត្តមាន ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា លោក ឌី វិជ្ជា ប្រធានសហភាពសហព័ន្ធយុវជនកម្ពុជា ខេត្តស្វាយរៀង និងលោក រស់ ឆាយ ប្រធានក្រុមការងារយុវជនគណបក្សប្រជាជនកម្ពុជា ខេត្តស្វាយរៀង ព្រមទាំងមានការអញ្ជើញចូលរួមពីអស់លោកលោកស្រីជាប្រធាន អនុប្រធាន ក្រុមការងារ និងសមាជិកសមាជិកាជាច្រើនរយនាក់ទៀត។
ក្រោយពីអង្គសន្និបាតបានតាមដានស្តាប់របាយការណ៍បូកសរុបសកម្មភាពតាមរយៈ ឆ្នាំ២០១២ ដែលបង្ហាញ ដោយ ឯកឧត្តម ទុំ សារ៉ាវុទ្ធ អនុប្រធានសហភាពសហព័ន្ធយុវជនកម្ពុជាខេត្តស្វាយរៀង និងបទអន្តរាគមន៍របស់តំណាងយុវជនស្រុកក្រុងទាំង ៨ ជាបន្តបន្ទាប់រួចមក។ ក្នុងខ្លឹមសារពីការងារសហភាពសហព័ន្ធយុវជនកម្ពុជា បានអនុវត្តន៍កន្លងមក ជាឧត្តមប្រយោជន៍ និងត្រូវបានសង្គមកោតសរសើរ ដូចជាការអប់រំ យុវជន យុវនារីឱ្យនៅឆ្ងាយពីគ្រឿងញៀន តាមរយៈការបង្កើតឱ្យវគ្គហ្វឹកហាត់កីឡា ជាច្រើនប្រភេទ និងបានរៀបចំវគ្គបណ្តុះបណ្តាលជូនសមាជិក សមាជិកា លើមុខជំនាញវគ្គខ្លីៗជាច្រើនដូចជា ផ្នែកកុំព្យូទ័រ រដ្ឋបាលទូទៅ ភាសាបរទេស។ ក្នុងនោះក៏បានចូលរួមធ្វើសកម្មភាពសង្គមដូចជា បរិច្ចាគឈាម ចុះសួរសុខទុក្ខវីរកងទ័ព ជួសជុលផ្លូវ សាលារៀន ដាំដើមឈើ ជួយច្រូតកាត់ និងបង្កបង្កើនផលជូនប្រជាពលរដ្ឋ ជាពិសេស បានចូលរួមអនុវត្តន៍គោលនយោបាយភូមិឃុំមានសុវត្ថិភាព។
នៅក្នុងអង្គសន្និបាត ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានមានប្រសាសន៍សំណេះសំណាលដោយសម្តែងនូវការកោតសរសើរចំពោះថ្នាក់ដឹកនាំ និងសមាជិកសមាជិកា យុវជនទាំងអស់ដែលនៅក្នុងរយៈពេលមួយឆ្នាំកន្លងទៅនេះ បានចូលរួមអនុវត្តន៍ការងារជាមួយអាជ្ញាធរដែនដី ភូមិ ឃុំ សង្កាត់ បានល្អលើគ្រប់វិស័យ ជាពិសេស បានចូលរួម អនុវត្តនូវគោលនយោបាយចាស់ សកម្មភាពថ្មី លើវិស័យដីធ្លី វាស់វែងដីជូនប្រជាពលរដ្ឋ។
ពាក់ព័ន្ធទិសដៅរបស់យុវជនដែលជាទំពាំងស្នងឫស្សី ឯកឧត្តម ហ៊ុន ម៉ានី ក៏បានធ្វើការណែនាំដល់យុវជនដែលបានចូលរួមនៅពេលនេះត្រូវបន្ត និងធ្វើការផ្សព្វផ្សាយនូវលក្ខន្តិកៈសហភាពសហព័ន្ធយុវជនកម្ពុជា ឱ្យបានទូលំទូលាយបន្ថែមទៀត សំដៅធ្វើឲ្យយុវជននៅគ្រប់ស្រទាប់វណ្ណៈយល់ពីខ្លឹមសារនៃលក្ខន្តិកៈ ដើម្បីកសាង ការពារ និងធ្វើការអភិវឌ្ឍប្រទេសពីមនុស្សចាស់ពីពេលនេះ និងទៅថ្ងៃអនាគត។ ជាមួយគ្នានោះដែរ ឯកឧត្តម ហ៊ុន ម៉ានី ក្នុងនាមប្រធានសហភាពសហព័ន្ធយុវជនកម្ពុជា បានបញ្ជាក់រំលឹកដល់យុវជនទាំងអស់ត្រូវបន្តសិក្សារៀនសូត្រឱ្យបានគ្រប់ជំនាញវិជ្ជាជីវៈ និងប្រព្រឹត្តអំពើល្អ ដើរឱ្យឆ្ងាយពីគ្រឿងញៀន ហើយដើម្បីបំពេញតួនាទីជាពលរដ្ឋកម្ពុជា យុវជនទាំងអស់ ដែលមានអាយុគ្រប់បោះឆ្នោត ត្រូវត្រៀមលក្ខណៈសម្បត្តិទៅចូលរួមបោះឆ្នោតជ្រើសរើសតំណាងរាស្ត្រ សម្រាប់នីតិកាលទី៥នៃរដ្ឋសភាឱ្យបានគ្រប់ៗគ្នា។
ឯកឧត្តម ប្រធានសហភាពសហព័ន្ធយុវជនកម្ពុជា បានកោតសរសើរចំពោះសកម្មភាព និងការងាររបស់សហភាពសហព័ន្ធយុវជនកម្ពុជាខេត្តស្វាយរៀង ដែលបានខិតខំជំរុញ ការធ្វើសកម្មភាពតាមមូលដ្ឋានដែលទទួលបានលទ្ធផលជាទីមោទនៈ ហើយឯកឧត្តមបានលើកឡើងថា សហភាពសហព័ន្ធយុវជនកម្ពុជាខេត្តស្វាយរៀង ជាខេត្តគំរូ ក្នុងកិច្ចការងារជាច្រើនផ្តល់ជូនយុវជន ដែលជាសសរទ្រូងរឹងមាំរបស់ប្រទេសជាតិ។
គួរបញ្ជាក់ផងដែរថា សហភាពសហព័ន្ធយុវជនកម្ពុជា បានបន្តសកម្មភាពពីសមាគមយុវជនកម្ពុជា និងសមាគមយុវជនសាមគ្គីសង្គ្រោះជាតិ ដែលចាប់បដិសន្ឋិនៅថ្ងៃទី២ ខែធ្នូ ឆ្នាំ១៩៧៨។
ក្នុងអង្គពិធីនោះផងដែរ ឯកឧត្តម ហ៊ុន ម៉ានី បានប្រគល់លិខិតសរសើរដល់ឯកឧត្តម លោកជំទាវ លោក លោកស្រី អនុប្រធានក្រុមការងារយុវជនកម្ពុជាចុះជួយ ស្រុក ក្រុង ប្រធាន អនុប្រធានគណៈកម្មាធិការយុវជនកម្ពុជា ឃុំ-សង្កាត់ ហើយសមាជិក សមាជិកា បានទទួលអាហារសម្រន់ និងថវិកា ក្នុងមួយនាក់ ១ ម៉ឺនរៀលផងដែរ៕
