ក្រោយពី​បង្ក្រាប​គ្រឿងញៀន​ចាប់ខ្លួន​ជនសង្ស័យ​៧​នាក់​មក​សមត្ថកិច្ច​រក​ឃើញ​ថា មាន​ពាក់ព័ន្ធ​នឹង​គាស់​ផ្ទះ​នៅ​ជាយក្រុង​ដ៏​សកម្ម​មួយទៀត

ថ្ងៃ ពុធ ទី25 កុម្ភៈ ឆ្នាំ2015 ម៉ោង14:26   ផ្នែក: សន្តិសុខ និង សង្គម    ដោយ: វិមាន​

T-02-25-15-k-full

ភ្នំពេញ ៖ អាវុធហត្ថ​ការិយាល័យ​ជំនាញ​ប្រឆាំង​ការ​ជួញដូរ​គ្រឿងញៀន​រាជធានី​បាន​ស្រាវជ្រាវ​រក​ឃើញ​ថា មាន​ជនសង្ស័យ​៦​នាក់​បាន​ពាក់ព័ន្ធ​នឹង​ករណី​គាស់​ផ្ទះ​ដ៏​សកម្ម​មួយទៀត​នៅ​ជាយក្រុង​ភ្នំពេញ​បន្ទាប់ពី កម្លាំង​អាវុធហត្ថ​ខណ្ឌ​ពោធិ៍​សែន​ជ័យ សហការ​ជាមួយ​ការិយាល័យ​ស្រាវជ្រាវ​ប្រឆាំង​គ្រឿងញៀន ចុះ​បង្ក្រាប​នៅ​ភូមិ​ថ្មគោល​សង្កាត់​ចោមចៅ​ខណ្ឌ​ពោធិ៍​សែន​ជ័យ​និង​ខណ្ឌ​ដូនពេញ​ឃាត់ខ្លួន​ជន​សង្ស័យ​៧​នាក់​ជា​បន្តបន្ទាប់​ក្នុង​បទ​ជួញដូរ​ប្រើប្រាស់​ដោយ​ខុសច្បាប់​នូវ​សារធាតុ​ញៀន​កាលពី​ថ្ងៃទី​២៤​និង​២៥ ខែកុម្ភៈ ឆ្នាំ​២០១៥​តាម​បទបញ្ជា​របស់​លោក​ឧ​ត្ត​ម​សេនីយ៍​ទោ រ័ត្ន ស្រ៊ាង មេបញ្ជាការ​រង​កងរាជអាវុធហត្ថ​លើ​ផ្ទៃ​ប្រទេស​និង​ជា​មេបញ្ជាការ​កងរាជអាវុធហត្ថ​រាជធានី​រួចមក។

ក្នុង​ការ​ចាប់ខ្លួន​ជនសង្ស័យ​ទាំង​៧​នាក់​នោះ​សមត្ថកិច្ច​ដកហូត​បាន​ថ្នាំ​ក្រាម​ពណ៌ស​ចំនួន​៨​កញ្ចប់​តូច ទូរស័ព្ទ​ដៃ​ចំនួន​៣​គ្រឿង​និង​ម៉ូតូ​៦​គ្រឿង​ជញ្ជីង​ថ្លឹង​១ ដែកគាស់​១ ញញួរ​១ កាំបិត​១ បំពង់​ទីប​១ ទួលឺវីស​៤ កន្ត្រៃ​៥ កូនសោ​មួយ​ចង្កោម ដែក​ឆែប​២ នាឡិកា​១ កាបូប​១​ថវិកា​៧២០០០​រៀល​និង​៥​ដុល្លា។ មន្ត្រី​អាវុធហត្ថ​ការិយាល័យ​ស្រាវជ្រាវ​ប្រឆាំង​គ្រឿងញៀន​រាជធានី​បាន​បញ្ជាក់​កាលពី​ព្រឹក​ថ្ងៃទី​២៥ ខែ​កុម្ភៈ​ថា ជនសង្ស័យ​ទាំង​៧​នាក់​មានឈ្មោះ​ទី​១​ឈ្មោះ រុំ ដាវី ភេទ​ប្រុស អាយុ​២២​ឆ្នាំ ទី​២​ឈ្មោះ​ញ៉ែម សារ៉េត​ភេទ អាយុ​៣០​ឆ្នាំ ទី​៣​ឈ្មោះ ឆន ដេវីត អាយុ​២១​ឆ្នាំ ទី​៤​ឈ្មោះ ព្រុំ​ស៊ី​ដា​ភេទ​ស្រី អាយុ​២៥​ឆ្នាំ ទី​៥​ឈ្មោះ ថា​ន់ ផល្លែ​ន​ភេទ​ប្រុស អាយុ​៤២​ឆ្នាំ ទី​៦​ឈ្មោះ ហម សុភាព ភេទ​ប្រុស អាយុ​៣០​ឆ្នា ទី​៧​ឈ្មោះ សៀវ សឿ​តុង ភេទ​ប្រុស អាយុ​៤១​ឆ្នាំ។ ប្រភព​បន្ត​ថា ក្រោយពី​ចាប់ខ្លួន​ក្រុម​ខាងលើ​នេះ​រួចមក​ការិយាល័យ​ជំនាញ​ស្រាវជ្រាវ​រក​ឃើញ​ថា មាន​ជនសង្ស័យ​៦​នាក់​ក្នុងចំណោម​៧​នាក់​ជា​មុខសញ្ញា​ចាស់​ដែល​ធ្លាប់ធ្វើ​សកម្មភាព​គាស់​ផ្ទះ​ដ៏​សកម្ម​នៅ​ជាយក្រុង។

ឥឡូវនេះ​ការិយាល័យ​ស្រាវជ្រាវ​ប្រឆាំង​គ្រឿងញៀន​អាវុធហត្ថ​រាជធានី​បាន​រៀប​ចំ​ឯកសារ​បញ្ជូន​ជនសង្ស័យ​ទាំងអស់​ទៅ​សាលាដំបូង​ដើម្បី​ចាត់ការ​តាមច្បាប់​នៅ​ថ្ងៃទី​២៦ ខែកុម្ភៈ ឆ្នាំ​២០១៥៕