កណ្ដាល ៖ កម្ពុជាបាត់បង់ កីឡាករជម្រើសជាតិម្នាក់ផ្នែកបាល់បោះដែលត្រៀមខ្លួនប្រកួតស៊ីហ្គេមនៅប្រទេសម៉ាឡេស៊ីនាពេលខាងមុខនេះហើយដោយសារកីឡាកររូបនេះជួបឧប្បត្តិហេតុគ្រោះថ្នាក់ចរាចរស្លាប់នៅនឹងកន្លែងកើតហេតុលើកំណត់ផ្លូវជាតិលេខ១ក្នុងទឹកដីស្រុកកៀនស្វាយ។
ហេតុការណ៍នេះបានកើតឡើងនៅវេលាម៉ោង១៨និង១០នាទីថ្ងៃទី៤ខែវិច្ឆិកាឆ្នាំ២០១១ត្រង់ចំណុចភូមិដីឥដ្ឋស្រុកកៀនស្វាយខេត្តកណ្ដាលរវាងម៉ូតូនិងរថយន្ត។
ជនរងគ្រោះស្លាប់បាត់បង់ជីវិតមានឈ្មោះ ផល សុភ័ស្ស ភេទប្រុសអាយុ១៩ឆ្នាំមានស្រុកកំណើតនៅភូមិខ្លាខាំសេនារាជឧត្ដមស្រុកព្រះស្ដេចខេត្តព្រៃវែងបច្ចុប្បន្នស្នាក់នៅផ្ទះលេខ២៣៨ផ្លូវ២៧១សង្កាត់ទួលទំពូងទី២ខណ្ឌចំការមនរាជធានីភ្នំពេញបានជិះម៉ូតូម៉ាកC125ពណ៌ខ្មៅពាក់ស្លាកលេខភ្នំពេញ1AG-7919បើកបរម្នាក់ឯងចេញពីក្រុងភ្នំពេញឆ្ពោះទៅស្រុកកំណើតក្នុងគោលបំណងយកលុយទៅឲ្យឪពុកម្ដាយធ្វើស្រែមុនពេលរូបគេចេញទៅប្រកួតលកីឡាករស៊ីហ្គេមនៅប្រទេសម៉ាឡេស៊ីតែអកុសលជិះម៉ូតូមកដល់ចំណុចកើតហេតុខាងលើក៏បានជួបគ្រោះថ្នាក់នេះតែម្ដងទៅក្នុងទៅដៅបញ្ច្រាសទិសគ្នា។ក្រោយពេលកើតហេតុភ្លាមៗម្ចាស់រថយន្តបានបើកទ្វារឡានរត់គេចខ្លួនពីចំណុចកើតហេតុ។
ប្រភពព័ត៌មានពីចំណុចកើតហេតុបានឲ្យដឹងថានៅមុនពេលកើតហេតុគេឃើញអ្នកបើកបររថយន្តកែច្នៃពាក់ស្លាកលេខ2K-6762បើកបររេពេញផ្លូវក្នុងស្ថានភាពស្រវឹងស្រាហើយធ្វើឲ្យអ្នកជិះម៉ូតូដែលជាជនរងគ្រោះបាត់បង់ស្មារតីមិនដឹងថាគេចទៅតាមផ្លូវណាទើបបុកតែម្ដងទៅ។
ក្រោយពេលកើតហេតុភ្លាមសមត្ថកិច្ចប៉ូលិសស្រុកកៀនស្វាយបានចុះមកកាន់កន្លែងកើតហេតុធ្វើការវាស់វែងយកម៉ូតូនិងរថយន្តទៅរក្សាទុកនៅអធិការដ្ឋានស្រុកបណ្ដោះអាសន្នដើម្បីរង់ចាំការដោះស្រាយជាក្រោយ។
រហូតមកដល់ពេលនេះសមត្ថកិច្ចពុំទាន់ស្រាវជ្រាវអត្តសញ្ញាណអ្នកបើកបររថយន្តនៅឡើយទេ៕
សីហា
