យ៉ាងហោចណាស់មានអ្នកប្រដាល់ឡាវចំនួន៥នាក់ ត្រូវកម្ពុជាបបួលឲ្យមកប្រកួតជាមួយអ្នកប្រដាល់កម្ពុជា នៅលើសង្វៀនអប្សរាស្តាតចាស់ នាថ្ងៃសៅរ៍ទី៣០ ខែមិថុនា ឆ្នាំ២០១២ខាងមុខនេះ។ នេះជាកម្មវិធីមួយខែម្តងរបស់អប្សរា ដែលសហការជាមួយសហព័ន្ធ កីឡាប្រដាល់ក្រោមការឧបត្ថម្ភរបស់ណាហ្គាវើល ។
ក្នុងចំណោមអ្នកប្រដាល់ឡាវប្រាំរូបដែលមកនោះ គឺមានអ្នកប្រដាល់ពីរនាក់ដែលជាម្ចាស់មេដាយមាសកីឡាSea Games ឆ្នាំ២០០៩ គឺនូ ឃីត ម្ចាស់មេដាយមាសទម្ងន់៥៧គ.ក្រ ដែលត្រូវប្រកួតជាមួយអ៊ឹង បូរ៉ា អ្នកប្រដាល់កម្ពុជានៃក្លិបគុជសារកីឡា និងឡាវម្នាក់ទៀតឈ្មោះថង បាង ម្ចាស់មេដាយមាសទម្ងន់៥៧គ.ក្រដែរ ដែលត្រូវជួបប្រកួតជាមួយយ៉េន ឌីណា អ្នកប្រដាល់នៃក្លិបអប្សរាគុនខ្មែរ ។
នូ ឃីត និង អ៊ឹង បូរ៉ា នេះ ជាគូដណ្តើមខ្សែក្រវាត់សហព័ន្ធកីឡាប្រដាល់កម្ពុជាCBFទម្ងន់៥៧គ.ក្រ ។ នូ ឃីតអ្នកប្រដាល់ឡាវរូបនេះ ធ្លាប់មកប្រកួតនៅសង្វៀនស្តាតចាស់ម្តងរួចមកហើយកាលពីឆ្នាំមុន ដោយវ៉ៃឈ្នះរាជសីហ៍ ចាន់រ៉ា ឬសារឿន ចាន់ អ្នកប្រដាល់ក្លិបប្រឆាំងគ្រឿងញៀនដោយពិន្ទុ ។ដូច្នេះនូ ឃីតនេះ មិនធម្មតានោះទេ ។
គូខ្សែក្រវាត់មួយគូទៀត គឺទិត្យ សុវណ្ណគិរី អ្នកប្រដាល់ក្លិបអប្សរាគុនខ្មែរ ត្រូវជួបជាមួយអ្នកប្រដាល់ឡាវឈ្មោះ រ៉ុងផាត សារ៉ាងសាន់ ។អ្នកប្រដាល់ឡាវម្នាក់នេះ មិនដែលមកស្រុកខ្មែរទេ ។ បើតាមអ្នកផ្គូផ្គងនិយាយអោយដឹងនោះថា រ៉ុងផាត សារ៉ាងសាន់នេះក៏វ៉ៃល្អដែរ ដោយមានប្រវត្តិប្រកួតចំនួន៥៦ដង ក្នុងនោះឈ្នះបាន៤២ដងនិងចាញ់១៤ដង ។
ពីរគូវ៉ៃដណ្តើមខ្សែក្រវាត់នេះ អ្នកដែលឈ្នះនិងប៉ជាមួយអ្នកឈ្នះដូចគ្នា ដើម្បីប្រកួតផ្តាច់ព្រ័ត្រ ដណ្តើមយកខ្សែក្រវាត់CBFនៅថ្ងៃដដែលនេះ ។ ទិត្យ សុវណ្ណគិរី គេប្រកួតចុងក្រោយ វាយឈ្នះសារឿន ចាន់ អ្នកប្រដាល់ក្លិបប្រឆាំងគ្រឿងញៀនដោយពិន្ទុ ។ ចាំមើល តើខ្មែរទាំងពីររូប ឬឡាវទាំងពីររូប ដែលបានឡើងទៅផ្តាច់ព្រ័ត្រដណ្តើមខ្សែក្រវាត់នេះ ។
យ៉េន ឌីម៉ា អ្នកប្រដាល់ក្លិបអប្សរាគុនខ្មែរ ដែលជួបម្ចាស់មេដាយមាសឡាវឈ្មោះថង បាង នោះ គេហាក់គ្មានការចាប់អារម្មណ៍ចំពោះការប្រកួតនេះទេ ។ នេះបើតាមអ្នកចាប់គូនិយាយឲ្យដឹង។ ឌីណា អ្នកប្រដាល់កម្ពុជាយើងនេះ ក៏មិនធម្មតាដែរ ។គេប្រកួតពុំដែលចាញ់ឡើយ នៅក្នុងស្រុក ។តែជួបជាមួយបរទេសនិងជាម្ចាស់មេដាយមាសថែមទៀតក៏យ៉េន ឌីម៉ា ភ័យឬញញើតអ្វីឡើយ ។ គេប្រកួតចុងក្រោយ វាយឈ្នះសូយ គោ អ្នក ប្រដាល់ក្លិបអូដឹមកីឡាដោយពិន្ទុ ។
សែន រ៉ាឌី ហៅម្ទេសខ្មាំង នៃក្លិបអប្សារាគុនខ្មែរ នឹងជួបជាមួយអ្នកប្រដាល់ឡាវឈ្មោះ សុខាញ់ ឆៃផាន់យ៉ាវង្ស ក្នុងប្រភេទទម្ងន់៥៤គីឡូក្រាម ។រ៉ាឌី ជាជើងខ្លាំងវ័យក្មេងរបស់កម្ពុជា ដែលឡើងប្រកួតម្តងណាក៏ឈ្នះដែរ រាប់ទាំងអ្នកប្រដាល់ថៃ និង ឡាវ នេះផងដែរ។
រ៉ាឌី ជាអ្នកប្រដាល់ម្នាក់ដែលមានការហ្វឹកហាត់ដិតដល់ ឧស្សាហ៍ព្យាយាម ដូច្នេះហើយ កម្លាំងស៊ុហ្វរបស់គេវ៉ៃប្រាំទឹកគ្មានបញ្ហាអ្វីឡើយ ។ សែន រ៉ា ប្រកួតជាមួយអ្នកប្រដាល់បរទេសលើកចុងក្រោយ គឺវាយឈ្នះអ្នកប្រដាល់ថៃ Phet Bunsong កាលពីខែមុនលើសង្វៀនអប្សរាស្តាតចាស់នេះ ។
អ្នកប្រដាល់ឡាវរូបនេះ ពុំមានប្រវត្តិប្រកួតឡើយទេ ។ ប៉ុន្តែអ្នកចាប់គូអប្សរាអះអាងថា សុខាញ់ ឆៃផាន់យ៉ាវង្សនេះមិនអន់នោះឡើយ ព្រោះគូជាមួយម្ទេសខ្មាំងទាល់ល្អនិងខ្លាំង ទើបអាចជួបបាន បើល្មមៗមិនអាចទៅរួចជាមួយអ្នកប្រដាល់ខ្មែរយើងឈ្មោះសែន រ៉ាឌីនេះបានឡើយ ។ ចាំមើល រវាងសែន រ៉ាឌី និងសុខាញ់ ឆៃផាន់យ៉ាវង្ស តើអ្នកណាជាអ្នឈ្នះនោះ ? ។
កីឡាការិនីជនជាតិបារាំង ហាត់នៅក្នុងក្លិបអេភូថងកីឡា ម៉ា រីយ៉ែត នឹងជួបជាមួយកីឡាការិនីឡាវឈ្មោះ លូប៉ា សារ៉ាងសាន់ ក្នុងប្រភេទទម្ងន់៦០គ.ក្រ ៕
វិសិទ្ធ
| < មុន | បន្ទាប់ > |
|---|
