ព្រឹត្តិការណ៍នៃការប្រកួតកីឡាប៉េតង់ដណ្ដើមពានរង្វាន់លោកឧបនាយករដ្ឋមន្ត្រីស ខេង លើកទី១៣ ឆ្នាំ២០១២ បានបញ្ចប់ហើយកាលពីល្ងាចថ្ងៃទី២៥ ខែមិថុនា នៅពហុកីឡដ្ឋានជាតិ។ លោកឧបនាយករដ្ឋមន្ត្រីស ខេង ដែលជាប្រធានកិត្តិយសសហព័ន្ធកីឡាប៊ូល និងប៉េតង់កម្ពុជា បានអញ្ជើញចូលរួមបិទកម្មវិធី បំពាក់មេដាយ និងផ្តល់រង្វាន់ ដល់ក្រុមដែលដណ្តើមបានពានរង្វាន់នេះ ។
ចំពោះក្រុមដែលទទួលបានចំណាត់ថ្នាក់លេខ១ពានធំនេះ គឺក្រុមក្រសួងមហាផ្ទៃដែលមានកីឡាករសៀង វណ្ណា-តឹប នរ៉ា-យ៉ាច័ន្ទដារ៉ារិទ្ធ និង ខែម សុភ័ក្ត្រ ។ លេខ២ ក្រុមយោធភូមិភាគពិសេស ដែលមានកីឡាករថោង ឈឿន -ឱ សុបញ្ញា-ហេង ស៊ូមាន និង កីឡាករផាន់ ណារ៉េត។ លេខ៣ ក្រុមអគ្គភស្តុភារហិរញ្ញវត្ថុក្រសួងការពារជាតិ ។
វិញ្ញាសានារី ២នាក់ទល់២នាក់ លេខ១ ក្រសួងការពារជាតិដែលមានកីឡាការិនីអ៊ុក ស្រីមុំ និង កែ ឡេង លេខ២ ក្រសួងមហាផ្ទៃ មានកីឡាការិនីអ៊ុំ ចន្ទ្រា និង នុប ឆលីកា។ លេខ៣ មជ្ឈមណ្ឌលកីឡាកងយោធពលខេមរភូមិន្ទ ដែលមានកីឡាការិនី ឡុង លីម៉ា និង ឯម ពិសិដ្ឋ។
វិញ្ញាសាវ័យចាស់អាយុ ៥៥ ឆ្នាំឡើង លេខ១ ក្លិបបាយ័នដែលមានកីឡាករជា វាសនា- ម៉ម ខាន់រ៉ងសុក ស៊ីអាន និង កីឡាករពត សុផារ៉ុង។ លេខ២ ក្រសួងមហាផ្ទៃដែលមានកីឡាករ ឌុយ ធៅ-អ៊ុក យ៉ារី ជរ គឹមឈុន និង ប៉ូក ម៉េង។ លេខ៣ អគ្គភស្តុភារហិរញ្ញវត្ថុក្រសួងការពារជាតិដែលមានកីឡាករកឹង ភិរ៉ា- លឹម លី-ជន យ៉ាន់ណា និង សាន ស៊ីសាមុត។
ផ្នែកពានសមាគមលេខ១ ក្រសួងការពារជាតិដែលមានកីឡាករយឹម សោភ័ណ្ឌ-សុខ ច័ន្ទមាន-សុខ ច័ន្ទម៉ុល និង សុខ ចាន់ណា។ លេខ២ មជ្ឈមណ្ឌលកីឡាកងយោធពលខេមរភូមិន្ទដែលមានកីឡាករ រស់ ប៊ុនលី-អ៊ុក សំណាង-ខេង ចាន់រ៉ា និង អ៊ុន វណ្ណា។ លេខ៣ រដ្ឋាករទឹកស្វ័យត ក្រុងភ្នំពេញ ដែលមានកីឡាករធូ ចេង-ស៊ឹម សួរ-អ៊ុច សុខលី និង ជ្រិន វិចិត្រ។
សំរាប់ការប្រកួតឆ្នាំនេះ មានសមាគម-ក្លិបចំនួន ២៥ចូលរួមដែលមានកីឡាករ-កីឡាការិនីសរុបចំនួន១៨១នាក់ក្នុងនោះកីឡាការិនីចំនួន២៦នាកចូលរួមប្រកួត។ ការប្រកួតដែលមានចំនួន ១៨៨នោះមានវិញ្ញាសាប្រកួតដណ្ដើមយកពានចល័តមាន ២៨ក្រុមនិង ៩២ប្រកួត។ ការប្រកួតវ័យចាស់អាយុ ៥៥ឆ្នាំឡើងមាន១២ក្រុម ៣៤ប្រកួត ប្រកួតដណ្ដើមពានរង្វាន់នារី ២ នាក់ទល់ ២នាក់មាន១៣ក្រុម២៧ប្រកួត និង ប្រកួតដណ្ដើមពានសមាគម ៣៥ ប្រកួត ។
គួរបញ្ជាក់ថា ការប្រកួតកីឡាប៉េតង់ដណ្តើមពានរង្វាន់លោកឧបនាយករដ្ឋមន្ត្រី ស ខេង លើកទី១៣ឆ្នាំ២០១២នេះ ជាលើកដំបូងសំរាប់វគ្គថ្មី ក្រោយពីវគ្គទី១បានបញ្ចប់រយៈពេល១២ឆ្នាំ ហើយក្រុមដែលយកបានពានលោកឧបនាយករដ្ឋមន្ត្រី ស ខេង៣ដងជាប់ៗគ្នានោះ គឺក្រុមអគ្គភស្តុភារហិរញ្ញវត្ថុក្រសួងការពារជាតិ ៕
វិសិទ្ធ
| < មុន | បន្ទាប់ > |
|---|
