សហព័ន្ធកីឡាបាល់ទាត់អន្តរជាតិហៅកាត់ថាFIFAនោះ បានបញ្ជូនមន្ត្រីជំនាញរបស់ខ្លួន មកបំប៉នដល់អាជ្ញាកណ្ដាលកម្ពុជា តាមរយៈការបើកវគ្គចំនួនប្រាំថ្ងៃនៅរាជធានីភ្នំពេញ ដោយចាប់ផ្ដើមពីថ្ងៃទី២៦ ខែមិថុនា ដល់ ថ្ងៃទី៣០ ខែមិថុនា ។
លោកដួង មាសចំរើនដែលជាប្រធានគណៈកម្មការអាជ្ញាកណ្ដាលសហព័ន្ធបាល់ទាត់ចាត់ទុកថា នេះជាវគ្គដ៏សំខាន់មួយសម្រាប់បង្កើនសមត្ថភាពយល់ដឹងបន្ថែមទៀតដល់អាជ្ញាកណ្ដាលកម្ពុជា ។ សិក្ខាកាមដែលចូលរៀនក្នុងវគ្គនេះ មានចំនួន៣៥នាក់ក្នុងនោះមាន២នាក់ជានារី ដែលមកពីរាជធានីភ្នំពេញ ខេត្តកណ្ដាល កំពង់ធំ តាកែវ បន្ទាយមានជ័យ ក្លឹបបាល់ទាត់ក្រសួងការពារជាតិ កងរាជអាវុធហត្ថលើផ្ទៃប្រទេស អង្គការកម្មវិធី Salt និងមកពីវិទ្យាស្ថានជាតិអប់រំកាយ និង កីឡា។
សិក្ខាកាមទាំង៣៥នាក់នេះ ជាអាជ្ញាកណ្ដាល ជំនួយការអាជ្ញាកណ្ដាល ទាំងអាជ្ញាកណ្ដាលកម្រិត FIFA និងមិនមែនFIFA ។ ពួកគេនឹងសិក្សាបន្ថែមលើចំណុច កែសម្រួលលើផ្នែកខ្លះៗនៃច្បាប់ប្រកួតនោះ ការអនុវត្តលើទីលាន នៅតែជាផ្នែកដ៏សំខាន់សម្រាប់វគ្គសិក្សានេះ។ អ្នកដែលចូលរួមក្នុងវគ្គនេះ នឹងបានទទួលវិញ្ញាបនបត្រដែលបញ្ជាក់ពីការចូលរួមគ្រប់ៗគ្នា។
លោកម៉ៃ តុលា ដែលជាអគ្គលេខាធិការរងសហព័ន្ធកីឡាបាល់ទាត់កម្ពុជាបញ្ជាក់ថា វគ្គនេះបណ្ដុះបណ្ដាលដោយគ្រូជនជាតិម៉ាឡេស៊ីដែលការិយាល័យអភិវឌ្ឍន៍របស់ FIFA ប្រចាំនៅកូឡាឡាំពួរបញ្ជូនមក គឺលោក Mohamad Rodzali Yacob ៕
វិសិទ្ធ
| < មុន | បន្ទាប់ > |
|---|
