*បឿតរិទ្ធីសុំស្គាល់ហុនគីរី
ផាន់ គ្រាន់ អ្នកប្រដាល់ក្លិបព្រះខ័នរាជ បន្ទាប់ពីសាកកណ្តាប់ដៃបានស្មើជាមួយឱមសំរេច អ្នកប្រដាល់ក្លិបកងពលតូចទ័ពឆ័ត្រយោង៩១១ កាលពីកណ្តាលខែមិថុនាកន្លងមក ពេលនេះគេបានសុំសាកកណ្តាប់ដៃជាមួយថុល មករាអ្នកប្រដាល់ក្លិបឃ្លាំងមឿងកីឡាម្តង នាល្ងាចថ្ងៃអាទិត្យទី០១ ខែកក្កដា ឆ្នាំ២០១២ នៅលើសង្វៀនស្ថានីយទូរទស្សន៍បាយ័ន ។
ថុលមករា ជាអ្នកប្រដាល់ស្រករក្រោយដូចផាន់គ្រាន់ដែរ តែការឡើងប្រកួតប៉ុន្មានដងកន្លងមក គេទើបស្គាល់ការចាញ់ម្តងតែប៉ុណ្ណោះ កាលពីប្រកួតជាមួយកែវ វិរះ អ្នកប្រដាល់ក្លិបគុជសារកីឡាកាលពីថ្ងៃទី១៦ ខែមិថុនាកន្លងមកនេះ ។មករា មានកណ្តាប់ល្អ លឿន រហ័ស ហើយគេប្រកួតឆ្លាតថែមទៀត ។
ចំណែក ផាន់ គ្រាន់ ក៏មិនអន់នោះដែរ រឿងវ៉ៃលើសង្វៀន ។ ជាអ្នកប្រដាល់ម្នាក់ ដែលមានចិត្តធំជាងមាឌ វ៉ៃមិនចេះខ្លាចញញើតគូប្រកួតបន្តិចណាឡើយ ។ ការប្រកួតចុងក្រោយរបស់គេ គឺស្មើជាមួយឪម សំរេច អ្នកប្រដាល់ក្លិបកងពលតូចទ័ពឆ័ត្រយោង៩១១ ។ផាន់ គ្រាន់ មានកណ្តាប់ដៃខ្លាំង រហ័ស ហើយលឿន ។ ឯស្នៀតជើងទាត់ និងជង្គង់របស់គេ ក៏មានលក្ខណះធ្ងន់ដែរ ។
ទោះជាយ៉ាងណា សំរាប់ការជួបប្រកួតរវាងផាន់ គ្រាន់ និង ថុល មករានេះ គេមិនហ៊ានទស្សន៍ទាយមុនថា អ្នកណាឈ្នះ អ្នកណាចាញ់នោះទេ ? ព្រោះថា ទាំងថុល មករានិងផាន់ គ្រាន់ អោយតែអ្នកណាហ៊ានធ្វេសប្រហែស ឬវ៉ៃរាងមើលស្រាលនោះ ប្រាកដជាជួបការបរាជ័យមិនខាន ។
បឿត រិទ្ធី អ្នកប្រដាល់ក្លិបនិរោធមានជ័យ នឹងប្រកួតជាមួយ ហុន គីរី អ្នកប្រដាល់ក្លិបតាព្រហ្មមានជ័យ ។ ពួកគេទាំងពីរនាក់នេះ មិនធ្លាប់ដែលជួបគ្នាទេពីមុនមក ។ ហុន គីរី វ៉ៃគ្មានផ្លែនោះទេ ប៉ុន្តែអ្នកប្រដាល់រូបនេះ មិនដែលចុះញ៉មអ្នកណាម្នាក់នោះឡើយ ។ បឿត រិទ្ធី មានស្នៀតជើងទាត់ និងជង្គង់អន់បន្តិច តែកណ្តាប់ដៃរបស់គេសាហាវណាស់ គឺវ៉ៃគ្មានសំចៃទុកទេមានប៉ុន្មានបញ្ចេញទាំងអស់ លៃយ៉ាងណាយកឈ្នះគូប្រកួតអោយបាន។ ឯហុន គីរីវិញ ក៏ដូចគ្នាដែរ ។ គីរី មិនត្រឹមតែវ៉ៃមិនខ្លាចទេ គឺថែមទាំងឌឺដាក់គេទៀតផង ។
ពីរនាក់នេះជួបគ្នាពិបាកធ្វើការសន្និដ្ឋានរឿងអ្នកណាឈ្នះ អ្នកណាចាញ់នោះណាស់ ព្រោះពួកគេទាំងពីរនាក់នេះ ប្រកួតពុំទៀងទាត់ជួនល្អ ជួនអន់ ។ដូច្នេះ ចាំមើលតើពីរនាក់នេះជួបគ្នា អ្នកណានឹងត្រូវអាជ្ញាកណ្តាលលើកដៃឈ្នះនោះ ? ។ការប្រកួតចុងក្រោយរបស់ បឿត រិទ្ធី គឺប្រកួតស្មើជាមួយស៊ីថា សារ៉ាន់ អ្នកប្រដាល់ក្លិបមជ្ឈមណ្ឌលកំចាត់មីនកម្ពុជា ឯ ហុន គីរីប្រកួតចាញ់រ៉ាក់ វិឆ័យ អ្នកប្រដាល់ក្លិបកាងពលតូចលេខ៧០ដោយពិន្ទុ ។
ចាន់ ស៊ីណាត អ្នកប្រដាល់ក្លិបនិរោធមានជ័យ នឹងឡើងប្រកួតជាមួយ យុគ យក្សផ្លែ អ្នកប្រដាល់ក្លិបអប់រំកាយខេត្តបាត់ដំបង ។ ស៊ីណាត និងយក្សផ្លែមិនធ្លាប់ដែលជួបគ្នាទេពីមុនមក ។
ស៊ីណាតនេះ ជាអ្នកប្រដាល់ដែលមានកណ្តាប់ដៃល្អ រហ័ស ហើយមានផ្លែល្អថែមទៀត។ តាំងពីឡើងប្រកួតមក ស៊ីណាតវ៉ៃចាញ់តិចដងណាស់ ។ ការប្រកួតចុងក្រោយ គេវាយចាញ់ម៉ន វិរះ អ្នកប្រដាល់ក្លិបព្រែកឯងកីឡាដោយពិន្ទុ ។
យុគ យក្សផ្លែ ក៏មានការរីកចំរើនខាងក្បាច់គុនប្រដាល់ដែរ ។ អ្នកប្រដាល់វ័យក្មេងរូបនេះ ក៏វ៉ៃមិនដែលសូវចាញ់ដែរ ។ យក្សផ្លែ មានមាឌមិនជាធំនោះទេ ហើយទាបថែមទៀត ប៉ុន្តែក្នុងការប្រកួតគេដេញវាយគូប្រកួតអោយរត់ពេញរេញ ។ ប្រកួតចុងក្រោយ យក្សផ្លែ វាយឈ្នះអាន មុន្នី អ្នកប្រដាល់ក្លិបនិរោធមានជ័យដោយពិន្ទុ ។ ចាំមើល តើយុគ យក្សផ្លែ អាចយកឈ្នះចាន់ ស៊ីណាត បានឬអត់ សំរាប់ការជួបគ្នានេះ ។
កីឡាការិនី ម៉ុន សម្រស់ ក្លិបមិត្តប៉ូលិស នឹងឡើងប្រកួតទូទាត់បំណុលជាមួយកីឡា ការិនីអេ យ៉ានុត ក្លិបអេភូថងកីឡា ។ កីឡាការិនីទាំងពីរនាក់នេះ ធ្លាប់ជួបគ្នាបីលើកហើយ ដែលក្នុងនោះសម្រស់វាយឈ្នះយ៉ានុតម្តង និងចាញ់ពីរដង ដោយចាញ់ឈ្នះត្រឹមពិន្ទុប៉ុណ្ណោះ ។ ម៉ុន សម្រស់ នាងមានកម្លាំងស៊ុហ្វខ្សោយជាងយ៉ានុត ។ជួបគ្នាលើកនេះ ពុំដឹងថា អ្នកណាជាអ្នកឈ្នះនោះឡើយ៕
វិសិទ្ធ
| < មុន | បន្ទាប់ > |
|---|
