*ក្រុមបញ្ជាការដ្ឋានកងទ័ពជើងទឹកជាប់លេខមួយ !
ការប្រកួតបាល់ទះពានរង្វាន់ Leo សម្រាប់មណ្ឌលខេត្តព្រះសីហនុបានបញ្ចប់ហើយ ដោយក្រុមបញ្ជាការដ្ឋានកងទ័ពជើងទឹកទទួលបានចំណាត់ថ្នាក់លេខ ១ក្រោយពីយកឈ្នះក្រុមកងរាជអាវុធហត្ថលើផ្ទៃប្រទេស៣សិតទល់២សិតក្នុងការប្រកួតផ្តាច់ព្រ័ត្រនាល្ងាចថ្ងៃទី១៥ខែកក្កដាឆ្នាំ២០១២នោះ ។
ជ័យជំនះនេះ បានធ្វើវឲ្យក្រុមបញ្ជាការដ្ឋានកងទ័ពជើងទឹកជាប់លេខមួយប្រចាំមណ្ឌលខេត្តព្រះសីហនុនេះ ។
នៅក្នុងការប្រកួតផ្តាច់ព្រ័ត្រនេះ ក្រុមបញ្ជាការដ្ឋានកងទ័ពជើងទឹកឈ្នះកងរាជអាវុធហត្ថលើផ្ទៃប្រទេសទាំងលំបាកបំផុត គឺលទ្ធផលក្នុងពិន្ទុសិតទី១ពិន្ទុ២២ទល់២៥ សិតទី២ពិន្ទុ២៥ ទល់២១ សិតទី៣ពិន្ទុ២៥ទល់២០ សិតទី៤ពិន្ទុ២០ទល់២៥ និងសិតទី៥ពិន្ទុ ១៦ទល់១៤ ។
សំរាប់មណ្ឌលខេត្តព្រះសីហនុនេះ ក្រុមបញ្ជាការដ្ឋានកងទ័ពជើងទឹកបានលេខ ១ កងរាជអាវុធហត្ថលើផ្ទៃប្រទេសបានលេខ ២ ចំពោះក្រុមដែលចាញ់វគ្គពាក់កណ្ដាលផ្ដាច់ព្រ័ត្របានលេខ ៣ និង ៣ស្ទួន ។
គួរបញ្ជាក់ថា ៤ ក្រុមដែលបានឡើងដល់វគ្គពាក់កណ្ដាលផ្ដាច់ព្រ័ត្រគឺបានឡើងលេងបន្តវគ្គ២៤ក្រុមចុងក្រោយ ដែលមានសុទ្ធតែក្រុមខ្លាំងមកពីមណ្ឌលទាំង ៥ ដើម្បីប្រកួតគ្នាយកតំណែងជាជើងឯកពានរង្វាន់ Leo 2012 ដែលមានទឹកប្រាក់ ៤០លានរៀល នោះ៕
វិសិទ្ធ
| < មុន | បន្ទាប់ > |
|---|
